Златна лира 2025: Концерт на Даниел Апостолов - фагот и Дарко Мариновски - пијано

  • 17.10.2025
  • Концерти, Актуелно
Среда, 22 октомври
Музеј на македонската борба, 20 часот

Програма: 

В. А. Моцарт – Соната за фагот и пијано · К. Кројцер – Варијации за фагот и пијано · К. Сен-Санс – Соната за фагот и пијано оп. 168 · П. А. Генин – Карневал во Венеција за фагот и пијано · Н. Паганини – Каприс за соло фагот

Даниел Апостолов (Скопје, 1975) е еден од најистакнатите македонски фаготисти. Дипломира на ФМУ во Скопје како прв студент од дувачкиот оддел што студиите ги завршува со највисока оцена cum laude. Во текот на додипломските студии и по дипломирањето, учествува на повеќе меѓународни мајсторски курсеви, меѓу кои Летната академија „Моцартеум“ во Салцбург (Австрија, 1995), фестивалот „Шлезвиг-Холштајн“ во Либек (Германија, 1998) каде работи со прочуениот фаготист и педагог проф. Клаус Тунеман, како и на курсот кај проф. Албрехт Холдер во Вајкерсхајм. Постдипломските студии ги продолжува на Музичката академија во Љубљана, а уметничките постдипломски студии ги завршува во Германија, во класата на прочуениот проф. Албрехт Холдер.

Настапувал со Словенечката филхармонија, со оркестрите на Националната опера и балет во Љубљана и Марибор, а бил дел и од интернационалните оркестри во Алтенбург и Бајрот. Како солист и камерен музичар гостувал на најзначајните фестивали во Македонија и Европа, меѓу кои „Скопско лето“, „Охридско лето“, „Интерфест“ и „Есенски музички свечености“. Апостолов е активен член на триото „Македонико“ и на Скопскиот дувачки квинтет, а долги години работи во Македонската филхармонија. Паралелно со изведувачката кариера, работи и како професор по фагот и камерна музика на ФМУ – Скопје.

Критиката неговите настапи ги оценува како „виртуозни и смели подвизи“, а неговата интерпретација на фаготот ја гледа како спој на „импресивно долг здив и суптилно обликување на фразите, со темпераментна артикулација и жестокост“. Со тоа, Апостолов се вбројува меѓу уметниците кои постојано ги поместуваат границите и ги откриваат новите можности на инструментот.

Дарко Мариновски (Скопје, 1974) е пијанист со богата и разновидна кариера. Дипломира на ФМУ во класата на проф. Борис Романов, а магистрира под менторство на проф. Јасмина Чакар. Од 2009 до 2017 година ја извршува функцијата декан на Факултетот за применета музика при Универзитетот за аудиовизуелни уметности ИУ Еуропа Прима, каде во 2016 е избран за редовен професор. Од 2013 година е професор по пијано и корепетиција во ДМБУЦ „Илија Николовски – Луј“, а активен е и на Музичката и Филмската академија при УГД – Штип, каде работи со вокални и оперски класови и предава предмети од областа на звукот, акустиката и психоакустиката. Концертно настапувал во Македонија и во странство (Рим, Париз, Вашингтон), а има изведено и авторска музика за театар и филм. Член е на квартетот „Коскаров“, со кој во 2011 го снима албумот The Best of Jazz and Blues.

Критиката неговата пијанистичка интерпретација ја опишува како „сигурна и прецизна“, со „клавирски звук што дава цврста основа и ја збогатува бојата на ансамблот“. Со чувствителност и музикалност, Мариновски е уметник кој умее да создаде рамнотежа помеѓу солистичката изразност и камерната соработка, што ја прави неговата уметност особено ценета.