Четврток, 15 октомври, 20 часот, Музеј на македонската борба

На втората фестивалска вечер на 15-ти октомври ќе настапи Триото Интерарт во состав Александар Стефановски - флејта, Емилија Ристовска Стефановска - флејта и Татјана Божиновска - пијано. 

Триото „Интерарт“ е формирано во 1997 година во Германија, кога македонските флејтисти Александар Стефановски и Емилија Ристевска Стефановска, заедно со јапонската пијанистка Макико Хирата, настапуваат со рецитал во Алтенбург, по што следуваат два концерта во Македонија. Денешната формација ја сочинуваат Александар Стефановски – флејта, Емилија Ристевска Стефановска – флејта и Татјана Божиновска – пијано. Нивната долгогодишна работа е врзана за камерниот репертоар и за континуирано присуство на домашната и меѓународната концертна сцена.

Концертната програма на „Златна лира“ опфаќа дела од Гери Шокер (Three Dances), Марко Виденовиќ (Ивино), Александар Рубцов (Marbella Fantasy) и Жан-Мишел Дамаз (Trio), нудејќи разновиден музички израз во кој се испреплетуваат ритмичката разиграност, мелодиската лиричност и виртуозноста, со особен акцент на тембровите можности на двете флејти и пијаното и нивната меѓусебна камерна интеракција.

Значаен момент во афирмацијата на ансамблот е 2006 година, кога триото ја освојува престижната прва награда „Diploma d’Onore“ на „Torneo Internazionale di Musica“ во Париз. По натпреварот е покането да настапи во Рим заедно со уште шест камерни состави – лауреати од различни делови на светот. Истата година „Интерарт“ ја добива битолската награда „4 ноември“ и признанието „Најуспешни битолчани“ на „Битолски весник“. Во јули 2009 година освојува трето место на меѓународниот фестивал Premio „Città di Padova“ во Падова.

Триото настапува на „Охридско лето“, „Скопско лето“, „Денови на македонска музика“, „Златна лира“, „Интерфест – Битола“, „Битолско културно лето“, „Хераклејски вечери“, „Музички вторник“, „Есенски музички свечености“, „Струшка музичка есен“, „Струшки вечери на поезијата“, „Св. Николско културно лето“ и други манифестации. Меѓународната дејност ги опфаќа Франција, Италија, Германија, Грција, Хрватска, Норвешка, Турција, Малта и САД. На 8 септември 2007 година ја претставува Македонија во Македонскиот културен центар во Њујорк, каде е промовиран и првиот компакт-диск, а во 2008 година настапува на фестивалот North Quabbin’s Center for Performing Arts во Њу Салем, САД. Следуваат втор компакт-диск со современа музика во 2008 и трет во 2010 година, како и инструментален видеоспот емитуван на македонските телевизии.

Во поновата активност се вбројуваат концертите во Прилеп и во Македонскиот културен центар во Истанбул во 2025 година, настапот на „Струшки вечери на поезијата“ и „Битфест 2025“, како и продолжувањето на фестивалските гостувања и во 2026 година. Медиумски осврт од концертот во Прилеп во 2025 година ја опишува вечерта како исполнета со „виртуозност и емоција“ (Bitola News), формулација што соодветно го сумира спојот на техничка сигурност и камерна комуникација што ансамблот го гради повеќе од две децении.

Влезот е слободен.